Иако тимот на Flat Earth Society нема да се согласи со нас, Земјата е тркалезна. Добро, не баш во вистинска смисла на зборот, но ние ќе го користиме тој термин. Но, дали некогаш сте се запрашале зошто е тркалезна?
За сѐ е „виновна“ силата поради која на Њутн му падна јаболкото на глава. Претпоставувате, станува збор за гравитацијата. Исак Њутн беше еден од првите што ја предложи идејата дека Земјата не е совршено округла, туку дека е сплескана на половите и издолжена по екваторот. Беше во право. Растојанието на јадрото од површината е приближно 21 километар поголемо кон екваторот отколку кон половите. Гравитацијата е подеднакво силна насекаде на Земјата. Ако ова не беше точно, тогаш ќе имаше многу големи разлики во атмосферскиот притисок на Земјата и нивото на морето. Честичките на исто растојание се под влијание на истата гравитациона сила што предизвикува сферична форма. Кога на ова ќе ги додадеме Земјината ротација и центрифугалната сила, ќе добиеме малку поовален облик.
Поради нерамномерната распределба на масата на Земјата, таа е уште понесовршена отколку што мислиме. Ајде прво да се позанимаваме со тоа како воопшто станала тркалезна. Се верува дека Земјата е формирана пред околу 4,6 милијарди години. Се формирала од огромна количина прашина и гас што се наоѓала во Сончевиот Систем. Она што го знаеме е дека секоја маса привлекува некоја друга маса. Гравитационата сила е всушност многу слаба. Тоа е најслабата од четирите основни сили, но кога станува збор за милијарди тони гравитациона сила помеѓу телата, таа секако станува значајна. Голема количина на гас и прашина под влијание на гравитацијата се згуснува во протопланетен диск во кој се формираат акумулации на честички кои под зголеменото влијание на гравитацијата ја формираат најсоодветната форма - сфера.
Меѓународната астрономска унија донесе одлука во 2005 година дека ваквиот процес на формирање е еден од критериумите за некој објект да се смета за планета.
Поради издаденоста на екваторот, најоддалечената точка од центарот на Земјата не е Монт Еверест, туку вулканот Чимборазо во Еквадор. Причината за ова е што вулканот е поблизу до екваторот. Кога на Земјата би имало само вода и кога наклонот на нејзината оска постојано би се менувал со поголема брзина, нашата планета би била совршено тркалезна и глатка. Ние сепак ја сакаме какво што е. Сплескана, несовршена, зелена, сина, погодна за живот и прекрасна.