Затворениот руски опозициски политичар Алексеј Навални вчера соопшти дека бил префрлен во самица во, како што рече, очигледен обид да биде замолчен.
Навални, најистакнатиот критичар на претседателот Владимир Путин во Русија и жесток противник на војната во Украина, кој веќе отслужува затворска казна од 11 и пол години за измама, непочитување на судот и прекршување на условната казна, ги отфрла обвиненијата како политички мотивирани и монтирани.
Навални рече дека само неколку дена пред да го посетат членовите на блиското семејство, затворските службеници му рекле дека тој се смета за „невиден криминалец“ и дека ќе биде преместен во тесна ќелија, каде што повеќе не се дозволени посети.
„Нема да имам повеќе посети...што е тука е, ќе го поднесам филозофски. Тоа го прават за да ме замолчат. Значи, која е мојата прва должност? Така е, да не се плашам и да не молчам“, рече Навални во неколку објави на Twitter пренесени од неговите најблиски луѓе, додавајќи дека одлуката за забрана на неговите посети одразува „навистина неописливо ѕверство, многу карактеристично за Кремљ“.
Тој ја заврши серијата твитови со апел до луѓето да се борат со војната и Путин.
Руското Министерство за внатрешни работи не одговори веднаш на барањето за коментар.
Навални минатиот месец рече дека властите отвориле нова кривична постапка против него за промовирање тероризам и екстремизам, што би можело да ја удвои должината на неговата затворска казна.
