Рускиот опозиционер Алексеј Навални го даде првото интервју од затвор, споредувајќи го истиот со кинески „работен логор“, велејќи дека е принуден осум часа на ден да гледа државна телевизија.
Навални отслужува затворска казна од две и пол години во затвор оддалечен 100 километри источно од Москва. За New York Times изјави дека деновите на тешка работа во советскиот гулаг се завршени, но заменети со психолошко насилство преку перење на мозокот и пропаганди.
Вели дека во затворот владее култура на кодошење и константно надгледување. Чуварите го надгледуваат него и останатите затвореници додека гледаат државна пропаганда, не дозволувајќи им да читаат или пишуваат. Ако некој случајно заспие, веднаш го будат.
Понатаму во интервјуто, Навални не ја губи надежта дека еден ден грешката ќе биде исправена, а Русија ќе стане демократско општество. Вели дека никој од затворениците не го нападнал, дури и му е забавно со нив.
На крајот од разговорот, Навални прозборува и за невролошките нарушувања кои му се јавиле во затворот, нагласувајќи како сега се помалку изразени особено откако чуварите престанале да го будат на секој час во ноќта.
„Сега разбирам зошто недостатокот од сон е еден од омилените начини на мачење на специјалните служби. Нема траги и невозможно е да издржите“, истакна рускиот опозиционер.
Овој месец Навални е обвинет за нови кривични дела поради кои би можел да остане во затвор уште три години. Доколку судот го прогласи за виновен, на слобода најрано може да се најде во 2024 година.