Руската затворска служба одлучи денеска да го префрли Алексеј Навални во затворската болница по тринеделно штрајкување со глад.
Здравствената состојба на рускиот опозиционер Алексеј Навални е оценета како задоволителна и тој секојдневно е изложен на прегледи, стои во соопштението.
„Докторите решија да го префрлат Алексеј Навални на болничкиот оддел за осуденици што се наоѓа на подрачјето на казнената колонија број 3 во регионот Владимир“, гласи соопштението на затворската служба на тој регион. Се додава и дека со негова согласност му се дадени и витамини.
Здравствената состојба на Навални, за кого се стравува дека му е закануваат проблеми со срцето и бубрезите што може да доведе до смрт, е загрижувачка бидејќи веќе преживеа труење со нервен гас, пишува AFP.
Навални започна штрајк со глад во знак на протест против лошите услови и постапки во затворот. Тој ги обвинува затворските власти дека му го скратуваат пристапот до доктори и лекови.
На социјалните мрежи соопшти дека пие само вода. ЕУ побара од Русија да му се даде соодветна здравствена нега на Навални. САД вчера предупредија дека ќе има последици по Русија ако Навални почине.
