Имаше план Алексеј Навални, затвореник во Русија, да биде разменет со платениот убиец Вадим Красиков, кој издржува доживотна казна затвор во Германија, но рускиот претседател Владимир Путин одлучи поинаку, изјави претседателката на Фондацијата за борба против корупцијата, Марија Певчих. Оваа Фондација е основана од Навални.
Според неа, по целосната инвазија на Украина, „станало очигледно дека Навални мора да биде ослободен од затвор по секоја цена“ по што неговите поддржувачи решиле да ја организираат неговата размена за еден од руските шпиони затворени на Запад.
Како што рече Певчих, ваквата размена може да се изврши за неколку месеци доколку има политичка волја, но „американските и германските претставници кимнаа со главите со разбирање, но не направија ништо“.
Со посредство на „познатите политичари“ и „најбогатите луѓе на планетата“, рече Певчих, соработниците на Навални успеаја првпат да добијат одобрение за планот за размена во пролетта 2023 година, но потоа на крајот сè се распадна. До декември планот беше повторно одобрен. Според Певчих, предлогот за размена на Навални на Владимир Путин му го дал бизнисменот Роман Абрамович.
Според нејзините зборови, пренесени од Медуза, на 15 февруари добила информација дека преговорите за размена на Навални за Красиков „се во завршна фаза“.
„Ви ја кажувам оваа приказна за сега да имате одговор на прашањето зошто е убиен Навални. На Путин му беше јасно: единствениот начин да се добие Красиков е да го замени со Навални“, рече таа.
Певчих го изрази своето мислење дека Путин е „опседнат со омраза кон Навални“ и дека претседателот „толку го мрази што дејствува на штета на себе и на сопствените рационални интереси“.
Певчих не обезбеди никакви документи или докази за поддршка на оваа верзија.
