Плејмејкерот на Сакраменто Кингс, Де'Арон Фокс, е првиот добитник на новата награда во НБА лигата, која му се доделува на најдобриот играч во одлучувачките моменти од некој натпревар, т.н. НБА клач играч на годината.
Во описот на наградата стои дека му се доделува на играчот „кој го прави најдоброто за своите соиграчи во тесните завршници“. Наградата е именувана по легендарниот Џери Вест, познат како Мистер Клач, кој имаше репутација дека е клучен играч за Лос Анџелес Лејкерс при неизвесни завршници.
Фокс убедливо го освои првото место со 460 бодови, а 91 од 100 гласачи го имаа него ставено на прво место. Втор заврши играчот на Мајами Хит, Џими Батлер, со 104 бодови, додека трет заврши ДеМар ДеРозан од Чикаго Булс со 80 бодови.
Тесни завршници, или „клач“, се сите ситуации кога разликата помеѓу две екипи е 5 или помалку поени во последните 5 минути од натпреварите. Фокс сезонава во вакви ситуации постигна вкупно 194 поени, а трипати во текот на сезоната го постигна победничкиот кош во последните секунди од натпреварите.
Со просек од 25,0 поени, 6,1 асистенции и 4,2 скока Фокс го предводеше Сакраменто до третото место во Западната конференција и прв пласман во плеј-оф за овој клуб после долги 16 години.