Фановите на „The Office“ и Мајкл Скот сигурно ќе бидат задоволни.
Замислете Мајкл Скот од „The Office“ да добие тим од научници и астронаути и одврзани раце да развие програма со која САД ќе имаат целосна доминација врз вселената.
Тоа е премисата во првиот трејлер за новата комична серија на Netflix насловена едноставно „Space Force“, со Стив Карел во главната улога на генералот Марк Р. Неард.
Неард е одликуван пилот кој сонува да биде шеф на Воздухопловните сили, но наместо тоа, го изместува од колосек веста дека е назначен да ја води штотуку формираната шеста гранка на Вооружените сили на САД – Вселенските сили (Space Force).
Иако е скептичен за тоа што подразбира службата, тој решава да даде сѐ од себе на работното место, што секако претпоставувате, воопшто не му оди од рака.
Една од јасните шеги уште во трејлерот е поврзана со тоа што членови на специјалните сили постојано се подбиваат со наредбите од претседателот. Иако името на актуелниот претседател на САД, Доналд Трамп, не се спомнува, не може да не се поврзат точките: самото име на серијата е името на новата воена гранка што ја отвори Трамп. Тој повика да се формираат Вселенските сили во јуни, 2018 година и истите беа формирани лани.
Во „Space Force“ ќе ги гледаме талентираните Џон Малкович, Дијана Силверс, Тауни Њусам, Бен Шварц, Лиса Кудроу, Џими О. Јанг...
Премиерата е закажана на 29 мај на Netflix.
