Немирите поттикнати од убиството на 17-годишниот Нахел М. од страна на полицијата, што со денови ја потресуваше Франција, се чини дека стивнуваат, а апсењата и извештаите за насилство опаднаа синоќа.
До полноќ, само 49 лица беа уапсени, соопшти Министерството за внатрешни работи, многу помалку отколку во истото време претходните ноќи, кога беа палени автомобили и јавни згради, а полицијата се водеше улични битки со младите во градовите низ земјата.
Телевизиската компанија BFMTV објави дека до 1:30 часот се уапсени уште 29 лица.
Во некои жаришта, вклучувајќи го и градот Лион, полицијата употреби солзавец против екстремно десничарските активисти кои ги исполнија улиците очигледно за да се спротивстават на бунтовниците.
Се стравуваше од шестата ноќ на широко распространети немири во предградијата на Париз во вторникот за време на сообраќајната контрола, но до утринава не беа пријавени поголеми акти на насилство.
За релативниот мир можеби придонесе безбедносната операција и апелот на бабата на момчето да се смират тензиите, упатен преку медиумите.
Министерот за внатрешни работи Жералд Дарманан се потпира на силно полициско присуство трета ноќ по ред, распоредувајќи 45.000 полицајци и оклопни возила низ целата земја.
Дарманан, според француските медиуми, им наредил на полицајците да дејствуваат решително и што поскоро да ги уапсат луѓето. Француската полиција уапси повеќе од 1.300 луѓе во четвртата ноќ од немирите, а повеќе од 700 во петтата ноќ.
Бабата на момчето вчера даде интервју во кое повика да се прекинат немирите.
„За среќа, полицијата е тука. До луѓето кои сега кршат, апелирам ‘Прекинете’. Го искористија Нахел како изговор“, изјави таа за BFMTV.
Иако е револтирана од полицаецот кој го застрела нејзиниот внук, таа рече дека не сака да генерализира за полицијата.
„Ќе биде казнет како и сите други“, изјави Надја, чие презиме, како и на Нахел, не се споменува во медиумите.
„Имам доверба во судството“, истакна таа и додаде дека луѓето треба да останат мирни и да не уништуваат сè околу себе.
Полицаецот обвинет за убиство на тинејџерот е приведен и покрената е истрага за убиство од небрежност.