Витиер е мал град на Алјаска, лоциран на стотина километри јужно од Енкориџ и најчесто се нарекува „град под еден покрив“.
Причината е едноставна - сите 217 жители, колку што има во овој град, живеат во една зграда. До овој град може да се стигне само со брод или подземниот тунел.
Зградата во која живеат сите жители се вика Begich Towers и била поранешна касарна изградена во 1974 година за време на Студената војна. Има 14 ката и сите луѓе што живеат во неа со месеци не мора да излегуваат надвор, бидејќи во неа има сѐ што им треба.
Имено, на приземјето се сместени поштата, градската администрација, продавница каде што можат да купат сѐ што им треба, а на третиот кат имаат дури и болница. Чудото нема крај, па децата одат во училиште кое е поврзано со оваа зграда со подземни премини и тунели.
Begich Towers исто така потсетува на хотел, така што на сите посетители им е обезбедено ноќевање со појадок, а сите што ќе дојдат во Витиер имаат можност да се запознаат со животот во овој мал град.
Исто така е важно да се истакне дека Витиер е град кој е исклучително посетен во лето, полн со туристи, додека во зима е скоро целосно затворен. Интересен факт е дека во него живеат луѓе кои со работата се врзани за железницата, на која ѝ припаѓа скоро целото земјиште во оваа област.
Се смета дека ова е една од причините зошто сите живеат во една зграда, бидејќи поради наведената сопственост, тие не можат да купат земјиште за да изградат куќа за себе. Сепак, поради овој долгорочен начин на живот, би можело да се каже дека жителите на Витиер немаат ништо против што сите живеат под еден покрив, пишува Business Insider.
