Поранешниот англиски репрезентативец и поранешен капитен на Манчестер Јунајтед тврди дека лидерот во Премиер лигата нема да издржи до крај.
„Топчиите“ синоќа во големото лондонско дерби го победија Тотенхем со 2:0 и се стекнаа со дури 8 бодови предност пред најбискиот конкурент Манчестер Сити, а за тоа заслуга имаат и играчите на Манчестер Јунајтед кои во саботата со 2:1 ги победија токму „Граѓаните“.
Моментален пласман:
- Арсенал 47
- Манчестер Сити 39
- Њукасл 38
- Манчестер Јунајтед 38
- Тотенхем 33
Сепак, Гари Невил смета дека тоа нема да биде доволно за Арсенал на крајот од сезоната да заврши прв на табелата во Премиер лигата. Во својот подкаст на Sky Sports прогнозираше дека „Топчиите“ нема да завршат ниту како втори во поредокот. На прашањето дали Арсенал ќе ја освои премиер лигата, Невил одговори негативно.
„Знам дека тоа ќе ги изнервира навивачите на Арсенал, но одговорот е - не. Нема да ја освојат Премиер лигата. Манчестер Сити повторно ќе биде шампион, а мислам дека Манчестер Јунајтед ќе заврши втор. Радо би сакал Арсенал да дојде до титулата, тоа би било добро за Премиер лигата. Би сакал и Јунајтед да ја освои, но тоа сезонава нема да се случи“, рече Невил.
„Реалноста е таква пшто Сити во еден момент ќе тргне со серија добри резултати, а кога тоа ќе го направат ќе играат двапати против Арсенал. Ако Ерлинг Холанд почне да дава голови, одбраната уште повеќе ќе се зацврсти, Сити ќе победува. Ќе дојде период од сезоната во кој на Арсенал ќе му биде тешко. Дали е замисливо Арсенал да продолжи вака? Мислам дека не е. Два пораза и едно реми во три натпревари и повеќе нема да бидат во предност. А, мислам дека токму тоа ќе се случи“, додаде тој, анализирајќи зошто ќе дојде до пад кај Арсенал.
Арсенал во наредните две кола ќе игра против двата ривала од Манчестер. Прво на 22 јануари во Лондон го пречекува Јунајтед, а потоа на 27 гостува кај Сити.