Twitter ќе му ја предаде контролата врз претседателскиот профил @POTUS на Џо Бајден откако тој ќе ја положи заклетвата како нов американски претседател, дури и ако Доналд Трамп не признае пораз, објавија американските медиуми.
Приватниот профил на Трамп @realDonaldTrump, со околу 88 милиони следбеници, стана едно од најмоќните оружја на Трамп за јавно оспорување на резултатите од изборите, а официјалниот претседателски профил @POTUS се користи главно за пренесување на неговите објави од приватниот, а има околу 32 милиони следбеници.
По инаугурацијата на Бајден, Трамп ќе смее да продолжи да го користи приватниот профил, но ќе ги изгуби специјалните заштити што ги има благодарение на статусот на светски лидер. Twitter претходно соопшти дека, откако Трамп „ќе се симне од функцијата“, тој ќе се однесува кон неговиот приватен профил како и со сите други од кои се шират неточни информации.
Социјалната мрежа долго време беше под притисок да ја ограничи употребата на платформата од страна на Трамп за ширење на теории на заговор и дезинформации.
Вчера се огласи и Faceebok, соопштувајќи дека ќе го предаде официјалниот профил POTUS на следната администрација.
„Во 2017 година соработувавме и со администрацијата на Обама и со новата администрација на Трамп за да обезбедиме глатка транзиција на нивните профили на Facebook и Instagram почнувајќи од 20 јануари, па очекуваме дека истото ќе се случи и овојпат“, рекоа од компанијата за Reuters.
