Во најкраткиот трејлер досега Nintendo покажа како ќе изгледа мачкиниот костим што го носи познатиот водоинсталатер.
Компанијата Nintendo ги изненади фановите и објави нов трејлер за филмот „The Super Mario Bros. Movie“. Клипот од 30 секунди прикажува дополнителни кадри од почетната сцена кои ги видовме во вториот трејлер, но и дополнителна содржина од борбата помеѓу Донки Конг и Марио, односно една од моќите на омилениот водоинсталатер - мачкин костим.
Мачкиниот костим првпат го видовме во „Super Mario 3D World“ во 2013 година, но бидејќи Nintendo донесе многу нови способности во текот на годините за главниот лик да ги преземе, ќе мора да почекаме до премиерата на филмот за да видиме кои сѐ од нив ќе се најдат во него.
Новиот трејлер го означува и првиот пат кога го слушнавме гласот на Сет Роган како Донки Конг, откако последен пат можевме да го слушнеме остатокот од актерската екипа - Крис Прат како Марио, Џек Блек како Баузер, Ања Тејлор-Џој како Принцес Пич и Чарли Деј како Луиџи.
По објавувањето на вториот трејлер за филмот „The Super Mario Bros. Movie“, креаторот на „Mario“ игриците, Шигеру Мијамото, рече дека Nintendo го редизајнирал ликот Донки Конг за првпат откако се префрли на 3D во 1994 година. Компанијата имаше за цел малку поведар изглед, кој повеќе потсетува на оној од оригиналната игра.
Премиерата на филмот ќе биде на 7 април годинава.
