Норвешкото Министерство за надворешни работи соопшти дека ќе протера 15 вработени во руската амбасада, со образложение дека станува збор за разузнавачи кои дејствувале под превезот на дипломатски позиции.
„Одлуката на владата е одговор на променетата безбедносна ситуација во Европа, што доведе до зголемена разузнавачка закана од Русија“, соопшти Министерството за надворешни работи. „Службениците за кои станува збор мора наскоро да ја напуштат Норвешка“, се додава во соопштението.
Руската амбасада во Осло не беше веднаш достапна за коментар за Reuters. Членката на НАТО Норвешка дели граница со Русија на Арктикот.
„Ова е важен чекор во спротивставувањето и намалувањето на нивото на руската разузнавачка активност во Норвешка, како и во заштитата на нашите национални интереси“, изјави норвешката министерка за надворешни работи Аникен Хуитфелд.