Во Норвешка укинувањето на мерките против коронавирусот беше прославено на бурен начин.
Во градовите беа организирани големи забави, ноќните клубови и пабовите преполни, а локалните медиуми наведуваат дека атмосферата била прилично бурна.
Неколку луѓе побарале медицинска помош бидејќи се онесвестиле додека чекале во долги редици. Во повеќе градови полицијата регистрирала тепачки, имало повредени, но и уапсени.
„Имаше прекршоци и насилство“, соопшти Руне Хекејстранд од полицијата во Осло, додавајќи дека има и потешко повредени.
Во Тонсберг дошло до масовна тепачка во пристаниште, додека во регионот Агдер поради неред се уапсени 12 луѓе.
Норвешка пред два дена ги укина мерките бидејќи е постигнат висок степен на вакцинирани луѓе, веќе нема потреба од физичка дистанца и ограничен број луѓе кои можат да присуствуваат на настани и собири.
Единствено на сила е одредбата за карантин во случај на инфекција со коронавирусот, додека постепено се укинуваат ограничувањата за влез во земјата.
