Откако го загубија летното засилување Џорџињо Вајналдум, римјаните сега останаа и без Николо Ѕаниоло кој синоќа против Кремонезе го измести рамото.
Рома синоќа се мачеше да постигне гол во дебито на „Олимпико“ во новата сезона против новиот тим во Серија А, Кремонезе. Ѕаниоло беше еден од најактивните кој зрачеше со преголема самодоверба и желба за гол.
При еден негов напад и дуел со грузискиот репрезентативец Лука Лочошвили во 42. минута, Ѕаниоло лошо падна на рамото и остана да лежи во болка. Беше изнесен од теренот со спрецијалното медицинско возило и тоа директно во клиниката Вила Стјуарт каде му беа направени испитувања и рендген. На негово место влезе Стефан Ел Шаарауи.
Вестите кои Жозе Мурињо ги доби не се ни добри ни лоши: Ѕаниоло има дислокација на левото рамо и ќе мора да паузира 3-4 недели. Нема фрактура, ниту ќе биде потребна операција.
Лошата вест за Мурињо е што в саботи на гостувањето кај Јувентус дефинитивно останува без 23-годишниот офанзивец.
Младиот Ѕаниоло навистина нема среќа со повредите во кариерата бидејќи досега успеа да ги скине вкрстените лигаменти на двете колена, и тоа едното во јануари 2020, а другото во септември истата година.
Инаку, Рома успеа да ги освои трите бода синоќа. Промашувањата на офанзивците ги поправи англискиот дефанзивет Крис Смолинг кој при нафрлување од корнер на Лоренцо Пелегрини во 65. минута заби со глава, гол кој на крајот го одлучи победникот.