На глобалните берзи, цената на нафтата порасна минатата недела, за првпат од крајот на август, но значително флуктуираше бидејќи трговците стравуваат дека зголемувањето на каматните стапки од централните банки ќе предизвика рецесија, што ќе ја ослаби побарувачката за „црното злато“.
Цената на барелот на лондонскиот пазар за испорака во ноември минатата недела порасна за 2,1 отсто на 87,96 долари, додека на американскиот пазар цената на барелот порасна за 0,9 отсто на 79,50 долари.
По четири недели пад, цените на нафтата пораснаа минатата недела, нешто подалеку од најниските нивоа во последните девет месеци.
„Променувањето на цените стана норма бидејќи трговците ја балансираат загриженоста за глобалната економија и најавите за можни намалувања на снабдувањето со нафта“, рече Стивен Бренок од брокерската компанија PVM.
Поради високата инфлација, централните банки на западните земји последниве месеци набрзина ги зголемуваат каматните стапки, а тоа ќе го забави растот на економиите, а се зголемуваат и ризиците од рецесија.
Американскиот ФЕД ги зголеми каматните стапки за 0,75 процентни поени во последните три сесии, а неговите лидери најавуваат натамошни зголемувања.
Минатата недела беше објавено дека инфлацијата во еврозоната во септември достигна рекордни 10 отсто, па наскоро се очекува Европската централна банка втора сесија по ред да ги зголеми каматните стапки за агресивни 0,75 процентни поени.
Негативно на цената на нафтата имаше и веста дека во септември производството на Организацијата на земјите извознички на нафта (ОПЕК) достигна највисоко ниво од 2020 година, надминувајќи го договорениот пораст.
Од друга страна, цените се поддржани од очекувањата дека ОПЕК ќе го намали производството, поради забавувањето на економскиот раст и зголемувањето на каматните стапки.
ОПЕК и неговите сојузници на состанокот на 5 октомври ќе одлучат дали ќе го намалат производството за 500.000 до 1 милион барели дневно.
