Водителката на CNN Кристијана Аманпур се извини откако во нејзина емисија го спореди мандатот на американскиот претседател Доналд Трамп со нацистичкиот погром на Кристална ноќ.
Таа минатата недела изјави дека нападите на претседателот Трамп се напади врз историјата, фактите, знаењето и вистината, како што тоа бил геноцидот врз Евреите.
„Не требаше да правам споредби. Хитлер и неговите злосторства секако имаат посебно место во историјата. Жал ми е за секоја болка предизвикана од мојата изјава“, посочи Анампур.
Таа на почетокот од емисијата за настаните во светот на 12 ноември изјави дека поминале 82 години од Кристалната ноќ, која доведе до геноцид против еден цел идентитет. Аманпур потсети на палењето на книгите, истакнувајќи дека тоа водело до напад врз „фактите, историјата и вистината“.
Израелски официјални претставници ја осудија таквата споредба, истакнувајќи оти тоа е навреда на сеќавањата на холокаустот и побараа извинување.
Израелската министерка за дијаспора Омер Јанкелевич наведе дека американската телевизиска мрежа треба да биде „партнер во глобалните напори за борба против антисемитизмот, а не да дотура масло на огнот“.
„Искористувањето на сеќавањето на холокаустот за евтини наслови или политички цели е загрижувачко и е искривување на историјата и на моралната вистина“, посочи Јанкелевич.
