Режисерот Џејмс Камерон се надева дека едвај чекате да го видите продолжението на „Avatar“ - ќе му треба секој денар.
Се ближи премиерата на филмот „Avatar: The Way of Water“, а очекувањата за новиот филм се огромни. Оригиналниот филм постигна неверојатен успех во кината, со заработка од 2,9 милијарди долари, поради што и денес, 12 години по неговата премиера, е најуспешниот наслов на сите времиња.
Иако не е позната точната сума од буџетот што му беше на располагање на режисерот Џејмс Камерон за продукцијата на продолжението, тој неодамна за GQ изјави дека снимањето на овој филм било „многу скапо“. Камерон, исто така, откри дека им рекол на Disney и на студиото 20th Century дека продолжението е „најлошиот деловен случај во историјата на филмот“. Режисерот верува дека новиот филм „ќе мора да биде трет или четврти филм со најголема заработка во историјата. Тоа е прагот. Тоа е излегување на нула“.
Зад првиот дел од франшизата Avatar на листата на филмови со најголема заработка ширум светот стои „Avengers: Endgame“, кој во кината заработи 2,7 милијарди долари. „Titanic“, исто така во режија на Камерон, е на третото место со 2,1 милијарда долари, а потоа следуваат „Star Wars: The Force Awakens“ (2,07 милијарди долари) и „Avengers: Infinity War“ (2,05 милијарди долари) - ова се единствените пет филмови кои успеале да заработат повеќе од 2 милијарди долари.
Ќе биде многу интересно да се види како публиката ќе го прифати „The Way of Water“, особено ако се земе предвид дека многумина побрзаа во кината да го гледаат првиот дел поради револуционерното 3D искуство во тоа време - 72% од приходот на оригиналниот Avatar беше реализиран на 3D проекции.
„The Way of Water“, кој исто така ќе биде прикажан во 3D, користи неколку најсовремени технологии за снимање филмови, вклучувајќи нови подводни камери, вештачка интелигенција и алгоритми, кои би требало да го направат еден од визуелно највпечатливите филмови некогаш направени.
Премиерата на филмот „Avatar: The Way of Water“ е закажана за 16 декември, а доколку гледачите масовно се соберат во кината, Џејмс Камерон планира да сними уште три продолженија. Доколку тоа се случи, не се сомневаме дека буџетите за овие продолженија ќе бидат исто толку огромни.
