Градоначалникот на Скопје, Петре Шилегов, вчера на Facebook објави фотографии од новиот тематски парк Дино парк, лоциран веднаш до скопската Зоолошка градина. Паркот од денеска е официјално отворен за посетители.
„За сите оние кои сакаат да се впуштат во нови и возбудливи авантури, да дознаат нешто повеќе за неверојатниот свет на диносаурусите и имаат желба да видат како изгледале Тираносаурус, Стегосаурус и Алосаурус во природна големина, ќе имаат прилика тоа да го искусат и доживеат.
Дино паркот се простира на површина од 2.000 квадратни метри и има вкупно 41 диносаурус од креда и јура периодот, од кои дел се во природна големина со синхронизирани движења, проследени со звуци“, стои во објавата на Шилегов.
Вратите на Дино Парк ќе бидат отворени за посетители од 09:00 до 21:00, а цената на влезот е 50 денари. Влезот е од Градскиот парк.
Во Facebook објавата на Зоолошка градина Скопје стои дека ова е најзелениот тематски парк каде што се засадени 430 високостеблести и нискостеблести растенија. Новиот парк е заеднички проект на Градот Скопје и Зоолошката градина.