На видео сервисот YouTube е објавен првиот трејлер од долгоочекуваната игрица „Grand Theft Auto 6“.
Официјалното објавување на трејлерот беше најавено за 5 декември во 15:00 часот по Гринич, но планот на Rockstar Games пропадна откако клипот „протече“ и се појави на социјалната мрежа X.
Иако профилот што го објави клипот набрзо беше суспендиран, трејлерот собра голем број прегледи, па Rockstar немаше причина повеќе да чека. Првиот официјален поглед на игрицата GTA 6 се појави околу полноќ на YouTube каналот на компанијата, а премиерата ја следеа десетици илјади корисници. По еден час вееќе имаше милиони прегледи.
Трејлерот потврди голем број мали детали кои наизменично се појавуваа за игрицата во изминатите две години, вклучително и поставката Vice City, како и првиот женски протагонист заедно со машки лик во популарната серија со елементи на приказната инспирирани од Бони и Клајд.
Во трејлерот е потврдено дека игрицата ќе излезе во 2025 година, но не е прецизирано за кои платформи ќе биде достапна.
Протекувањето на трејлерот не е прв ваков случај поврзан со „GTA 6“. На почетокот на годинава беше утврдено дека тинејџер од Велика Британија е одговорен за минатогодишното објавување на 90 снимки од развојниот процес на игрицата.
Дополнително, оваа недела на TikTok се појави видео од игрицата, наводно објавено од дете на вработен во Rockstar.
Потсетуваме, „GTA V“ излезе во септември 2013 година, па чекањето за шестката трае веќе подолго од една деценија.
