Од 1 февруари 2024 година единствена валута што може да се користи за готовински платежни трансакции и во платниот систем во Косово е еврото, соопшти Централната банка на Косово.
Според новата регулатива за готовинско работење, која беше усвоена од Управниот одбор на Централната банка на Косово на седницата одржана на 27 декември 2023 година и која ќе стапи на сила на 1 февруари, „другите валути што не се евра може да се користат во Косово само како вредност за складирање во физичка форма или на банкарски сметки во валути што не се евра, за вршење меѓународни плаќања во валути што не се евра и за девизни активности“.
Исто така, размена на валута може да се врши само преку институции лиценцирани од Централната банка на Косово кои ја нудат оваа услуга.
Српскиот динар до сега се користеше во Косово во областите каде живее мнозинско српско население, кое зема плати, пензии, социјална помош или друг вид на надоместоци од буџетот на Србија.
Како што соопшти Централната банка на Косово, целта на новата регулатива е да се подобрат и дефинираат регулаторните стандарди за професионално работење на финансиските институции во областа на готовинското работење, вклучувајќи контрола на количината на пари во оптек, заштита на интегритетот на финансискиот систем, борба против фалсификуваните пари, заштита на потрошувачите, борба против перењето пари и активности за финансирање тероризам, како и решавање на други прашања поврзани со делокругот на ЦБК.
Досега динарите во Косово беа во оптек преку Јавното претпријатие „Пошта Србије“, кое работи во српските области во Косово. Динари користеа и банките Поштанска штедионица и НЛБ Комерцијална банка, каде што постојат динарски сметки.
Динарите пристигнаа во Косово од Србија преку Народната банка на Србија, која има трезор во Лепосавиќ, општина со српско мнозинство на северот на Косово. Тие пари ги транспортираше компанијата за транспорт на пари Henderson.
Во уредбата на Централната банка на Косово сега се наведува дека увозот и извозот на банкноти и монети евра, како и на други валути, ќе се увезуваат во Косово исклучиво преку Централната банка на Косово.
Сепак, регулативата на Централната банка на Косово наведува дека другите валути, освен еврото, можат да се користат во Косово само како вредност за чување во физичка форма или на банкарски сметки во валути различни од еврото, за вршење меѓународни плаќања во валути што не се евра и за девизни активности.
