Владата одржа седница на која се разгледуваше олеснување на вонредните мерки воведени поради епидемијата на коронавирусот. Исполнети се условите за престанување на важењето на повеќе рестриктивни мерки, рече премиерот Оливер Спасовски на денешната прес-конференција.
„Од утре престанува забраната за движење, а од четврток почнуваат со работа угостителските објекти со прецизно опреден протокол за работа на отворени делови. Работата во затворените делови ќе се регулира наредниот период“, рече Спасовски.
Од 1 јуни прекинува важењето на дел од мерките донесени во вонредната состојба. Ќе престанат да важат одлуките на Владата со кои одредени лица беа ослободени од работните обврски. Ова нема да важи за одредени категории лица како на пример за родителите на деца до 10 години и деца на претшколска возраст, бидејќи за нив ќе се чека одлуката за работа на градинките, како и за хронично болните.
Задолжителниот карантин се заменува со домашна изолација, доколку лицата поднесат ПЦР тест направен во последните 72 часа. Сите лица во државен карантин може да направат тест на сопствен трошок, доколку тој биде негативен, да им се укине државниот карантин.
Спасовски најави дека сепак вирусот е сè уште присутен и задолжително е да се почитуваат мерките за лична заштита и одржување растојание. Тој рече дека зголемениот број на новозаболени случаи е јасно од каде се, алудирајќи на семејни собири и непочитувањето на дел од мерките.
По обраќањето на премиерот Оливер Спасовски на прес-конференцијата се обратија вицепремиерот за европски прашања, Бујар Османи, министерот за здравство Венко Филипче и во тек е обраќањето на доктор Жарко Караџовски .
Следете во живо.
