Првата дама на Украина Олена Зеленска не престана да го информира светот преку Instagram за ужасите што се случуваат во нејзината земја од почетокот на руската инвазија.
Овојпат таа објави фотографии од децата кои ги загубија животите во војната со Русија.
„Руските окупатори убиваат украински деца. Свесно и цинично. А бројката веројатно би можела да се зголеми овој момент кога нашите мирни градови се бомбардираат. Кога луѓето во Русија велат дека нивните војници не убиваат цивили, покажете им ги овие фотографии“, напиша Зеленска.
Меѓу нив е и 18-месечниот Кирил кој беше убиен откако Русите го гранатираа вториот по големина град во Украина. Снимката од скршената мајка на Кирил, Марина Јацко, и нејзиното момче Федор, го обиколи светот.
„Покажете им ги лицата на овие деца кои немаа шанса да живеат. Уште колку деца мора да умрат за Русите да престанат да пукаат и да дозволат да поминуваат хуманитарни коридори? Овие коридори ни требаат токму сега низ Украина! Стотици деца умираат во подруми без храна и медицинска помош. Руските војници убиваат семејства кои се обидуваат да ги напуштат зградите, а убиваат и доброволци кои се обидуваат да помогнат“, продолжи Зеленска.
„Апелирам до сите непристрасни медиуми во светот! Кажете ја оваа страшна вистина: руските напаѓачи убиваат украински деца. Кажете им на руските мајки и кажете им што точно прават нивните синови овде во Украина. Покажете им ги овие фотографии на Русинките - вашите сопрузи, браќа, сонародници убиваат украински деца! Кажете им дека тие се лично одговорни за смртта на секое дете од Украина затоа што премолчено се согласиле на такви злосторства! До сите земји од НАТО: затворете го небото над Украина! Спасете ги нашите деца, бидејќи тоа утре ќе ги спаси вашите“, поентира првата дама на Украина.