Не можеме да влијаеме на сите фактори на ризик за појава на рак, но можеме да влијаеме на некои, како што е храната.
Ова значи дека промената на вашата исхрана и избегнувањето на одредени намирници би можело да помогне во одржувањето на здравјето.
Храната што ја јадат мажите може речиси тројно да го зголеми ризикот од развој на агресивен рак на простата, според новата студија објавена во BJU International.
Ракот на простата е најчестиот вид на рак кај мажите и иако не се знае точно што предизвикува развој на болеста, постојат голем број фактори за кои се смета дека го зголемуваат ризикот. Сега истражувањата покажаа дека она што го јадат мажите може да го зголеми ризикот од тешка форма на рак на простата.
Нездравата храна го зголемува ризикот од рак на простата
Новата студија на истражувачите од Институтот за здравје Карлос III во Мадрид покажа дека мажите кои консумираат брза храна и газирани пијалоци се повеќе склони кон тумори опасни по живот. А токму брзата храна им е омилена на многу мажи, поради достапноста и, за жал, неодоливиот вкус.
„Нашите резултати покажуваат дека избегнувањето на нездрави навики во исхраната би можело да биде најдобрата нутритивна стратегија за спречување на агресивниот рак на простата“, нагласува д-р Адела Кастело-Пастор, автор на студијата од Институтот за здравје Карлос III, каде што е спроведена студијата, во која беа следени 5.296 учесници од Шпанија во период од околу 17 години.
Оние кои јаделе таканаречена „западна“ храна почесто добивале тумори кои се ширеле на други органи, а инциденцата се зголемувала и до 3 пати. Истражувачите нагласија дека „западната шема на исхрана“ се состои од:
- голем внес на млечни производи со висока содржина на масти,
- преработено месо
- рафинирани зрна
- слатки
- калорични пијалоци
- готова храна
- сосови
- мал внес на млечни производи со мала содржина на масти
- низок процент на цели зрна.
Храната предизвикува хормонална дисрегулација
„Постои сомневање дека вкупните и заситените масти и транс мастите од црвеното и преработеното месо, слатките, сосовите и готовата храна ја зголемуваат прогресијата на ракот на простата преку хормонална дисрегулација. Тие го зголемуваат оксидативниот стрес, што го отежнува ‘поправката’ на оштетувањето на ДНК и доведува до воспаление, кое ја зголемува клеточната пролиферација“, објасни д-р Адела Кастело-Пастор.
Многу соединенија кои се природно присутни или се јавуваат при готвење или преработка на црвено месо или други производи, според д-р Кастело-Пастор, може да влијаат на ризикот од рак на простата преку катализирање на формирањето на слободни радикали и потиснување на експресијата на гените вклучени во прогресијата на клеточниот циклус и поправка на ДНК во клетките на ракот на простата.
„Конечно, високиот енергетски профил на западната исхрана придонесува за зголемување на телесната тежина, најважниот познат ризик фактор за рак на простата, кој може да се промени“, истакна д-р Кастело-Пастор.
Медитерански и „паметен“ начин на исхрана против агресивни тумори
Во текот на периодот на следење, беа дијагностицирани нешто повеќе од 600 случаи на рак на простата. Освен западниот начин на исхрана, другите две групи испитаници ја следеле медитеранската исхрана како и „паметниот“ избор на храна. Паметната исхрана е богата со висок внес на млечни производи со малку маснотии, зеленчук, овошје, цели зрна и сокови. Од друга страна, медитеранската исхрана претставува висок внес на риба, зеленчук, мешунки, варен компир, овошје, маслинки и растително масло и низок внес на сокови.
Истражувачите наведуваат дека здравата исхрана не е доволна за да се спречи појавата на рак, туку е да се намали ризикот од развој на најагресивните облици на рак.
Утврдено е дека млекото и другата млечна храна го потиснуваат производството на хемикалии кои се борат против рак на простата, истакна д-р Катело-Пастор. Неколку претходни студии, исто така, покажаа врска помеѓу консумирањето зеленчук и намалениот ризик од рак на простата, но истражувањето на мадридските научници беше првото што конкретно ги разгледа најсмртоносните тумори.
