Филмот за познатиот физичар го освои светот и заслужено постигна голем успех со кој ретко кој биографски филм може да се пофали.
Летниот филмски хит и еден од најдобрите филмови на годината, Oppenheimer, викендов достигна заработка од 912 милиони долари, јавуваат бројни медиуми. Ова постави нов рекорд кој претходно го држеше филмот за Фреди Меркјури и групата Квин, Bohemian Rhapsody.
Bohemian Rhapsody заработи 910 милиони долари за време на прикажувањето во кината. Oppenheimer, кој уште се прикажува во кината, успеа да го престигне и е на работ од милијарда долари. Многумина предвидуваат дека ќе биде тешко да се достигне таа бројка.
Успехот на Oppenheimer, филм за физичарот Ј. Роберт Опенхајмер и развојот и последиците од создавањето на атомската бомба, најмногу може да се припише на феноменот Барбенхајмер. Бидејќи филмот беше објавен во исто време со Barbie, имаше големи заеднички маркетинг кампањи каде целта беше двата филма да покажат дека се подеднакво привлечни за филмската публика.
Многумина предвидуваат и дека филмот ќе биде меѓу водечките претенденти за Оскарите, кога се во прашање најдобрите главни и споредни актери и најдобриот режисер. Кристофер Нолан, кој ја потпишува режијата, веќе постигна повеќе од доволно успех – од филмот заработи околу 180 милиони долари.
