Во интервју за американскиот ТВ-новинар Такер Карлсон, Орбан рече дека Украинците се „неконкурентни“ без помошта на Западот и дека затоа САД го имаат клучот за мирот во регионот.
„Тоа е лага. Не е само недоразбирање, туку лага. Невозможно е. Секој во политиката кој разбира логика, бројки, податоци – немаат шанси“, одговори Орбан коментирајќи го преовладувачкото мислење во САД дека Украина победува.
„Ќе останат без војници пред Русија“, додаде тој.
Според Карлсон, бројот на убиените Украинци е стотици илјади, а Орбан додаде дека меѓу нив има и етнички Унгарци. Обидот на која било западна земја да испрати свои војници во Украина би значело директна војна меѓу Западот и Русија.
„И веднаш ќе се најдеме во трета светска војна. Така што сега е многу опасен момент“, оцени Орбан.
Според него, Русите нема да го предадат својот лидер, тие ќе ја чуваат земјата да не се распадне и ќе ја заштитат, ќе инвестираат повеќе пари и ќе произведуваат повеќе оружје од противниците.
„Затоа не треба погрешно да ги разберете Русите“, рече Орбан.
Запрашан што би направил доколку биде на чело на НАТО и „да биде, да речеме, Џо Бајден“, Орбан одговори: „Мир, веднаш. И веднаш би го повикал (поранешниот американски претседател Доналд) Трамп. Тоа е тоа“.
Тој додаде дека ако САД сакаат да го вратат мирот до утре наутро, би можеле да го сторат тоа.
„Очигледно е дека Украинците не може сами да го извлечат тоа. Тие не се конкурентни во оваа војна. Ако нема пари и оружје од Западот, особено од САД, тогаш војната е завршена. Одлуката е во ваши раце“, изјави Орбан.
„Се разбира, зборуваме за Украинците, тие не треба да се игнорираат, тие мора да бидат вклучени, но вистинскиот фактор не е Украина“, додаде тој.
Орбан исто така ја нарече идејата за одземање на Крим од Русија целосно нереална.
„Тоа не доаѓа предвид“, потенцира унгарскиот политичар.
