Американскиот суд го осуди Бастер Ернандес на 75 години затвор, познат како Brian Kill, злоставувач кој преку Facebook контактирал малолетнички и им барал разголени фотографии.
Вработените во Facebook го сметаат за „најлошиот криминалец“ кој ја користел нивната платформа. Тој преку Facebook контактирал малолетни жртви чија доверба ја злоупотребувал, барал од нив да му праќаат голи фотографии и видеа, а потоа со нив ги уценувал, им се заканувал со смрт, силување, закани дека ќе ги убие нивните најблиски, дека ќе фрли бомби во училиштата во кои одат и слично.
Неговото злоставување траело најмалку 3 години, а на жртвите им зборувал дека сака да стане „најлошиот сајбер терорист во светот. За да се заштити од полицијата користел комбинација од приватен оперативен систем и успешно ја маскирал IP адресата.
Беше фатен во 2017 година и тоа на необичен начин. Освен што ФБИ прими повеќе пријави за него, во лов на 29-годишниот Ернандес се вклучи и Facebook кој изнајми и плати услуги од компанија за сајбер безбедност, по што тој беше хакиран.
Преку посредник Facebook ги извести ФБИ за безбедносен пропуст во видео плејер, а тие таа информација ја искористија и му испратија видео со посебен код, за кое тој мислеше дека го испраќа една од жртвите. На тој начин, се дозна неговата IP адреса.
По апсењето и кога се дозна улогата на Facebook во сето тоа, од компанијата тврдеа дека тоа е единствениот пат во историјата да учествуваат во хакирање на свој корисник.
Ернандес користел софистицирани методи за да го сокрие идентитетот, па морало да бидат преземени несекојдневни мерки за да се заштитат жртвите.
Ернандес злоставувал или се обидел да злоставува 375 малолетници.
