Во пресрет на Задушница и со оглед на фактот дека со одлука на Владата е забранета посета на гробиштата на територија на целата земја од 4 до 8 јуни, Отец Пимен се огласи до верниците преку социјалните мрежи.
Тој завчера преку својот Facebook профил им порача на граѓаните да бидат разумни, со порака живите да им помагаат на живите.
„Па дајте ние живите да им помогнеме на живите. Нѐ не спасува нит инаетот, нит мерењето чив бог е поголем. Не е проблемот во мерките, туку во нивното кршење. Вечен спомен на починатите и разум на живите“, напиша Отец Пимен во објавата во која цитираше и извадок од Библијата.
Полицискиот час овој продолжен празничен викенд е воведен од 4 јуни во 21 часот до понеделник (8 јуни) до 5 часот наутро за Скопје (сите скопски општини), во Општина Куманово, Општина Липково, Општина Штип, Општина Тетово, како и во Боговиње, Брвеница, Теарце, Желино и Јегуновце.
Во сите останати градови полицискиот час е предвиден од 16 часот и да трае до следниот ден до 5 часот наутро. Петок (5 јуни) беше прогласен за неработен ден за сите граѓани.
Во периодот од четврток (4 јуни) од 21:00 часот до понеделник (8 јуни) до 05:00 часот, се забранува посета на гробиштата на територијата на цела држава, освен за погреби.
