Германскиот тјунер ABT е познат по тоа што ги прави атрактивните и брзи модели на Audi уште поатрактивни и побрзи, а најновиот проект на компанијата е RSQ8-R.
Со оглед на тоа дека стандардниот RSQ8 веќе се вбројува меѓу најбрзите СУВ возила во светот, не му беше потребно многу тјунирање за да го заземе местото на врвот. За остварување на оваа цел се потруди тимот на ABT, кој овој модел го претстави на својот 125-ти роденден. Симболично, тјунинг компанијата ќе продаде само 125 примероци од новата ѕверка.
ABT и лани понуди своја верзија на Audi RSQ8 која од 0 до 100 км/ч забрзуваше за 3,5 секунди и достигнуваше максимална брзина од 305 км/ч, но очигледно тоа не беше доволно.
Новиот RSQ8-R е уште помоќен, мапирана е ECU единицата, вграден е специјално дизјаниран меѓуладилник, а моторот на Audi сега развива 740 коњски сили и максимален вртежен момент од 920 Nm, наместо фабричките 600 КС и 800 Nm. Максималната брзина е зголемена на 315 км/ч, што значи дека RSQ8-R сега е најбрз СУВ во светот.
ABT поработи и на изгледот на возилото и подготви боди кит со многу карбонски компоненти како проширени калници, прагови, куќишта за ретровизорите, вентилациски отвоори, заден спојлер...
Тука е и новиот издувен систем од нерѓосувачки челик со четири цевки со дијаметар од 102 милиметри. RSQ8-R доби 23-инчни ABT High Performance HR фелни со гуми со димензии 295/35 R23.
Тјунерот не ја заборави ни внатрешноста на возилото, па сега RSQ8-R има нов волан, ново старт-стоп копче и рачка на менувачот. На праговите е ознаката на која стои редниот број на примерокот, од вкупно 125. ABT ознаки има на неколку места, вклучувајќи ги и патосниците.
