Цените на нафтата денеска паднаа под 86 долари на меѓународните пазари, бидејќи трговците се загрижени за падот на кинескиот извоз и увоз на почетокот на годината што сигнализира слаба глобална економија и потенцијално помала побарувачка за нафта.
На лондонскиот пазар цената на барелот по пладне беше пониска за 41 цент отколку на затворањето на тргувањето вчера и изнесуваше 85,77 долари. Речиси за исто толку барелот поевтини на американскиот пазар каде се тргуваше по 80,06 долари.
Трговците денеска беа вознемирени од падот на кинескиот извоз и увоз во јануари и февруари, и покрај укинувањето на строгите мерки за борба против Ковид, што сигнализира слаба странска побарувачка. Во фокусот на нафтените пазари беше првенствено падот на увозот на кинеска нафта.
„Со оглед на високата инфлација во САД и Европа, нивната побарувачка треба да продолжи да слабее, што исто така ја намалува побарувачката за преработка во Кина“, објасни Ајрис Панг од ING.
Цените денеска беа притиснати од посилниот американски долар пред сведочењето на претседателот на американската централна банка Џереми Пауел во Конгресот. Фокусот е на зголемувањето на каматните стапки за да се спречи инфлацијата и влијанието на построгите услови за финансирање врз економијата.
Посилниот долар обично ја намалува побарувачката за нафта бидејќи ја намалува куповната моќ на купувачите со други валути.
Позначителен пад на цената на нафтата беше спречен поради загриженоста за снабдување. Извршниот директор на Шеврон, Мајк Вирт, на конференција во Хјустон во понеделникот изјави дека „флексибилниот производствен капацитет е ограничен“ и дека глобалниот пазар е ранлив на потенцијални неочекувани нарушувања на снабдувањето.
„Клучна непозната во 2023 година ќе биде нарушување на извозот на руска нафта и нафтени деривати“, се вели во белешката од Комонвелт банка на Австралија, Вивек Дар.
Организацијата на земјите извознички на нафта (ОПЕК) одделно објави дека во понеделник цената на барел од нафтената кошничка на нејзините членки се зголемила за 76 центи, на 84,56 долари.
