Пандемијата со коронавирусот тешко се одрази на глобалната економија, а еден од секторите кои најмногу настрадаа беше автомобилската индустрија.
Во најразвиеното европско стопанство и гигант во автомобилската индустрија, Германија, продажбата на автомобили бележи драстичен пад.
Во Германија во мај е регистриран пад на продажбата на нови автомобили од неверојатни 51,5% во однос на истиот месец лани. Според специјализираниот автомобилски сајт Focus2move, автомобилската индустрија жестоко се бори да ја преживее кризата што произлезе од пандемијата со COVID-19, а загрижуваат и проекциите кои покажуваат дека закрепнувањето ќе биде бавно.
И пазарот на електрични автомобили не поминува сјајно:
Иако продажните салони во Германија се отворени од 20 април, купувачите не покажаа особен интерес. Во мај се продадени 150.597 нови автомобили, што претставува пад од 51,5% во споредба со мај, 2019 година. Падот за првите пет месеци од 2020 година вкупно е нешто помал, благодарение на солидниот почеток на годината пред да стигне епидемијата во Европа, и изнесува 35,6%.
Најголем пад во продажбата во Германија во мај забележаа BMW и SEAT – повеќе од 60% - додека од другата страна на спектарот Renault бележи пад од 35,6%.
Се поставува прашањето: ако Германија – која важи за најјакиот европски автомобилски пазар и земја со најсолидна автоиндустрија – се соочува со длабока криза во овој сектор, какви се шансите на останатите играчи?
