ЕУ одлучи дека целата пренослива електроника мора да го користи стандардот USB-C.
Европските пратеници денеска постигнаа договор со кој се бара целата пренослива електроника што се продава во регионот да користи USB-C порта за полнење. Новиот закон ќе важи и за уредите на Apple кои моментално користат Lightning приклучок за полнење.
Оваа одлука доаѓа по долгогодишно размислување. Според изменетите правила, сите идни паметни телефони, таблети, камери, електронски читачи и други уреди што се продаваат во ЕУ мора да имаат USB-C порта до есента 2024 година, многу порано од очекуваното.
Целта на овој договор е да се намали фрагментацијата, електронскиот отпад, како и да се воведе стандард за брзо полнење на повеќе уреди. Договорот е дел од пошироките напори на ЕУ да ги направи производите поодржливи.
Иако е договорено, оваа измена прво ќе треба да ја одобрат Европскиот парламент и Советот на Европа, но не се очекува да има некакви проблеми.
„Денес заедничкиот полнач стана реалност во Европа! Европските потрошувачи долго време се фрустрирани од повеќекратните полначи што се акумулираат со секој нов уред“, рече известувачот на Парламентот, Алекс Аџус Салиба. „Корисниците сега ќе можат да користат еден полнач за целата нивна пренослива електроника. Додадовме и одредби за безжично полнење како следна еволуција во технологијата за полнење, како и подобрени информации и етикети за потрошувачите“.
Стандардот за брзо полнење на кој ЕУ се согласи е USB Power Delivery, што многу USB-C уреди веќе го поддржуваат. Се чини дека оваа одредба не треба да ги спречи производителите да креираат сопствени стандарди за брзо полнење, туку само дека нивните уреди мора паралелно да поддржуваат USB Power Delivery.
Очигледно, најголемиот производител на уреди што ќе биде погоден од ова е Apple. Интересно е тоа што компанијата веќе користи USB-C во многу уреди, сè што треба да направи е со новиот договор конечно да ги усогласи своите нови гаџети, како и iPhone. Apple веќе некое време тестира USB-C на iPhone уредите.
Остануваат уште две години до крајниот рок и не се очекува повеќето производители да одолговлекуваат премногу за да се усогласат со оваа одлука. Сигурно е само дека потрошувачите ќе имаат корист, бидејќи повеќе нема да мора да носат различни полначи и кабли со себе.
