Во Париз денеска се одржува референдум на кој парижаните се прашуваат дали градот треба да ја зголеми цената на паркингот за SUV возилата, бидејќи француската престолнина продолжува со својот повеќегодишен план да стане целосно град погоден за велосипеди.
Референдумот, кој доаѓа помалку од една година откако парижаните гласаа за забрана на изнајмување е-скутери, има за цел тројно да ги зголеми таксите за паркирање за автомобили од 1,6 тони и повеќе, на 18 евра на час, за да ги обесхрабри „големите, загадувачки“ автомобили, соопшти градското собрание.
Новата тарифа ќе важи и за електричните автомобили од два тона и повеќе.
„Потешки, поопасни, позагадувачи... SUV возилата се еколошка катастрофа“, рече Емануел Грегоар, заменик градоначалник на Париз, на X.
За време на социјалистичката градоначалничка Ен Идалго, улиците на Париз се трансформирани, со 84 километри велосипедски патеки изградени од 2020 година и скок од 71 отсто во користењето велосипед помеѓу крајот на локдаунот за COVID-19 и 2023 година, според податоците на градското собрание.
Промените, сепак, ги налутија возачите на автомобили. Возачко лоби од 40 милиони сопственици на автомобили покрена петиција за поддршка на слободата на возачите да го користат возилото што го сакаат. SUV возилата стануваат сè попопуларни во Франција, а особено ги претпочитаат семејствата.
„Мораме цврсто да застанеме против овие напади врз слободата извршени под лажно зелени изговори“, рече групата.
„Ако не го запреме сега, овој неоправдан бунт предводен од ултраурбаното и противавтомобилското малцинство ќе се прошири како гангрена во другите градови“, додава тој.