Андреа Белоти го засили нападот на клубот од Фиренца, известуваат медиумите од Италија.
Она што деновиве се зборуваше на Чизмата, вечерва се оствари. Рома и Фиорентина се договорија за 6-месечна позајмица на италијанскиот репрезенттаивец.
„Виола“ на „Волчицата“ ќе ѝ плати 750 илјади евра за позајмицата, а договорот вели дека по истекот на истата Фиорентина не е обврзана да го откупи.
Белоти доаѓа во тимот на Винченцо Италиано поради слабата минутажа сезонава во Рома: играше на 14 натпревари во Серија А, но само на 6 беше стартер. Иако тренерот што слабо го играше, Жозе Мурињо, си замина, сепак од неговиот наследник Даниеле Де Роси доби зелено светло да си замине.
Во Рома дојде на крајот од летото 2022 година од Торино, каде претходно играше 7 сезони, станувајќи симбол на овој клуб.
Фиорентина бараше свежа крв во нападот откако летното засилување, Анголецот М'Бала Нзола, кој дојде од Специја за 12 милиони евра, тотално разочара откако постигна само 4 гола сезонава во 30 натпревари во сите натпреварувања (Серија А, Копа Италија, Европа конференциска лига и Суперкопа).
30-годишниот Белоти веднаш ќе му се стави на располагање на Италиано со оглед на тоа што нема да прави медицински прегледи во Фиренца откако Фиорентина одлучи дека е задоволна со неговите тестови направени летоска. Така, тој ќе биде во комбинација веќе за утрешното гостување кај Лече на „Виа дел Маре“, кога може да дебитира.
Прекарот на Белоти е Ил Гало, или во превод Петелот.