„Симпсонови“ со децении можеа да предвидат настани кои влијаат на реалниот свет. На пример, анимираната серија покажа дека милијардерите ќе патуваат во вселената, дека Disney ќе стане сопственик на студиото 20th Century Fox и дека Доналд Трамп ќе стане претседател на САД многу пред овие настани да се случат во реалниот живот.
Фановите на шоуто на Twitter велат дека се убедени дека и сценаристите на „Симпсонови“ успеале да ја предвидат неодамнешната трагедија во која животот го загубија пет патници од подморницата Титан на OceanGate. Епизодите кои ги потсетуваат на несреќата се Homer's Paternity Coot од сезона 17 и Simpsons Tide од сезона 9.
Во епизодата Homer's Paternity Coot од 2006 година, главниот лик на серијата, Хомер, влегува во подморница која случајно се заглавува на дното на океанот и неговото снабдување со кислород полека почнува да истекува. Пред да се знае дека Титан имплодирала, многумина веруваа дека и нејзините патници ќе доживеат слична судбина.
Во епизодата Simpsons Tide од 1988 година, Хомер се приклучува на морнарицата откако беше отпуштен од својата работа во нуклеарна централа. Оваа епизода обожавателите ја поврзуваат со трагедијата поради прикажување на дефект на воена подморница.
Исто така, фасцинантен за обожавателите е фактот што извршниот продуцент на оваа епизода, Мајк Реис, отиде да ги види остатоците од Титаник минатата година во експедицијата на OceanGate. Simpsons Tide беше последната епизода на која работеше Реис.
Сепак, Реис, поранешниот сценарист и продуцент на серијата, во едно неодамнешно интервју откри дека Simpsons Tide воопшто не е пророштво, туку дека преку таа епизода само сакале да му оддадат почит на филмот Crimson Tide во кој глуми Дензел Вашингтон, пишува CinemaBlend.
„Ја направивме таа епизода бидејќи штотуку излезе филмот Crimson Tide. Не ја предвидувавме иднината, само бевме инспирирани од филмот, а 20 години подоцна се случи нешто слично“, објасни Реис.
Иако обожавателите на серијата се убедени дека писателите на Симпсонови имаат пророчка моќ, професорот по филозофија од Универзитетот во Глазгов д-р Џон Доналдсон објасни зошто се појавува овој феномен.
Доналдсон рече дека „предвидувањето“ се случува затоа што „Симпсонови“ се реална серија која допира теми што се релевантни за нас и со кои се занимаваме секој ден, па затоа не е чудно што реалниот живот и серијата понекогаш се преклопуваат, имајќи предвид дека серијата има стотици епизоди.