Франц Бекенбауер, легендарниот германски фудбалер, почина на 79-годишна возраст, а веста за неговата смрт стигна во понеделникот.
Бекенбауер е роден на 11 септември 1945 година во Минхен и одбележа епоха во светскиот и германскиот фудбал.
„Со најдлабока болка објавуваме дека нашиот сопруг и татко, Франц Бекенбауер, почина мирно во сон во неделата, опкружен со членовите на неговото семејство. Бараме да го оплакуваме во мир и да се воздржите од прашања“, се вели во соопштението на семејството.
Бекенбауер ќе остане запаметен по тоа што со Германија беше светски првак и како играч и како селектор.
Неговото име ќе остане синоним за Баерн, каде за 13 години одигра преку 400 натпревари и освои сѐ што можеше.
Како активен фудбалер го освои Мундијалот во 1974 година, а потоа како селектор во 1990 година. Со Баерн четири пати ја освои Бундеслигата, три пати Лигата на шампионите, а во 1972 и 1976 година беше избран за најдобар играч во Европа како добитник на Златната топка.
Во 1977 година се пресели во Космос од Њујорк, а во 1980 година се врати во Германија во Хамбургер, со која го освои домашното првенство во 1982 година. Од 1984 до 1990 година беше селектор на Германија, а од 1994 до 2009 година беше претседател на Баерн. Како спортски директор беше и во Олимпик од Марсеј.
Познат по прекарот Кајзер, Франц важи за едно од најдобрите централни бекови во историјата на фудбалот, а во националниот тим одигра 103 натпревари и постигна 14 голови.
Тој боледуваше од Алцхајмерова болест, со поврзана деменција, а последен пат беше виден во јавноста во јануари минатата година.
