Од 16 до 23 мај 2022 година - по трагите на успехот на претходните изданија - во „Кинотека на Северна Македонија“ во Скопје ќе се одржи XXII Недела на италијанската кинематографија, филмска ревија на италијански филмови, оваа година посветена на хероите и антихероите во италијанскиот филм.
Настанот во организација на Амбасадата на Италија ќе биде отворен на денеска во 20:00 часот со проекција на филмот „Lo chiamavano Jeeg Robot“ (Го нарекуваа Џиг Робот) од 2015 година, оригинален трилер-фантазија во режија на Габриеле Маинети. Главна улога е Клаудио Сантамариа, кој со овој филм ја доби престижната награда Давид ди Донатело за најдобар главен актер, толкувајќи ја улогата на ситен криминалец од предградието кој се претвора во позитивен и непобедлив херој.
За Неделата сите филмови се преведени и титлувани на македонски јазик. Неделата ќе продолжи со прикажување на серија неодамнешни филмови, со меѓународно познати актери како Стефано Акорси и Матилда Де Анџелис, главни улоги на филмот „Veloce come il vento“ (Брз како ветрот, 2016), инспириран од вистинската приказна на рели возачот Карло Капоне. Овој филм ќе се прикажува во вторник.
Во среда и четврток два филма кои влегоа во историјата на италијанската кинематографија: „Mamma Roma“ (Мама Рома, во режија на Пјер Паоло Пазолини од 1962 година, со извонредната и незаборавна Ана Мањани, и конечно „Una vita difficile“ (Тежок живот, 1961) со величествениот Алберто Сорди кој заедно со Леа Масари толкува емблематичен лик на идеалист кој ги претставува промените што ги претрпеа Италија и Италијанците од повоениот период до годините на економскиот бум.
Петокот е резервиран за комедијата „Italians“ (Италијанци) од 2009 со Карло Вердоне, Рикардо Скамарчо и Серџо Кастелито.
Во сабота доаѓа „Tutto il mio folle amore“ (Сета моја луда љубов, 2019) - возбудливо патување низ Балканот - со Диего Абатантуоно, Валерија Голино и Клаудио Сантамариа.
Неделата се затвора в недела кога Елио Џермано, Изабела Рагонезе, Раул Бова, Лука Ѕингарети и Стефаниа Монторси ќе бидат протагонисти на драматичната и деликатна „La nostra vita“ (Нашиот живот, 2010).
