Министерот за надворешни работи во новата полска проевропска влада изјави дека би сакал германските лидери да размислуваат „креативно“ за компензација на Полска за огромните загуби што земјата ги претрпе за време на Втората светска војна, пишува Associated Press.
Барањето е значително намалено од она на претходната десничарска влада на Полска, која бараше репарации од 1,3 трилиони евра за инвазијата и окупацијата од 1939 до 1945 година. Германските власти постојано тврдат дека прашањето за репарациите било решено пред неколку децении, иако Берлин ја признава својата историска одговорност.
Полскиот министер за надворешни работи Радек Сикорски зборуваше на заедничката прес-конференција во Берлин со неговата германска колешка Аналена Баербок пред нивните разговори за подобрување на билатералните односи кои беа затегнати во времето на претходната влада на Полска.
„Исто така, ќе побарам од министерот да ја убеди германската влада да размислува на креативен начин за изнаоѓање форма на компензација за тие воени загуби“, рече Сикорски, говорејќи за проектот за одбележување на страдањата на Полска во Берлин. Тој не даде повеќе детали.
Баербок рече дека „справувањето со страдањата на милиони луѓе што Германија ги донесе во Полска останува вечна задача“. Таа директно не се осврна на барањата за обесштетување. За време на нацистичката окупација, Полска загуби околу 6 милиони свои граѓани, од кои половината беа Евреи.
Земјата претрпе огромни штети и во однос на индустријата, инфраструктурата и културното наследство. Германија инсистира на тоа дека прашањето за репарации било решено со одлуки донесени за време на комунистичката ера, кога Варшава се откажа од барањето репарации. Полска посочува дека во тоа време била под доминација на Советскиот Сојуз, па затоа декларацијата била дадена под притисок на Москва и не била правно обврзувачка.