Судењето на 96-годишната Ирмгард Фурхнер за учество во убиството на затворениците во концентрациониот логор Штутхоф за време на Втората светска војна е одложено бидејќи обвинетата е во бегство, соопшти судот во Ицехое, во близина на Хамбург.
„Провинцискиот суд издаде налог за апсење“, рече судијата Доминик Грос.
Според судот, обвинетата, која живеела во дом за стари лица во предградието на Хамбург, рано утрово се качила со такси, кое ја однело до првата метро станица во Хамбург. Нејзината моментална локација не е позната.
Денес, на првиот ден од судењето, требаше да се прочита обвинителниот акт и да се утврди дали обвинетата е при здрава свест и разум.
Фурхнер се товари за учество во убиството на 11.000 притвореници
Деведесет и шестгодишната Ирмгард Фурхнер е обвинета за помагање во убиството на најмалку 11.000 затвореници додека работела како стенографка во логорот Штутхоф во близина на Гдањск помеѓу 1943 и 1945 година.
„Обвинетата пружала систематска помош на раководството на логорот при убиството на затворениците“, се наведува во обвинението.
Според Централната канцеларија за идентификација на жртвите на националсоцијализмот, вкупно повеќе од 65.000 луѓе, претежно Евреи од Источна Европа, ги загубиле животите во концентрациониот логор Штутхоф. Логорот беше познат по тоа што, за разлика од другите нацистички логори, затворениците не биле убивани во гасни комори, туку повеќето од нив починале од исцрпеност и глад.
Меѓународниот комитет за Аушвиц изрази огорченост што обвинетата не се појави пред судот.
„Ова покажува неверојатен презир, не само за владеењето на правото, туку и за преживеаните од Холокаустот“, се вели во соопштението на комитетот.
Поради големиот интерес на медиумите, судењето треба да се одржи во индустриска сала во предградието на Хамбург.
Ова е веројатно едно од последните судења од ваков вид.
