Група платеници составена претежно од поранешни колумбиски војници го извршила напад во кој беше убиен претседателот на Хаити, Жовенел Моиз, соопшти полицијата.
„Во групата имало 26 Колумбијци и двајца Американци со хаитско потекло. Осуммина од осомничените сѐ уште се на слобода, додека 17, меѓу кои и двајцата Американци, се уапсени“, изјави началникот на полицијата Леон Шарл пред новинарите.
Останатите осомничени се убиени во борбите со полицијата во главниот град Порт-о-Пренс.
Група вооружени лица упаднаа во приватната резиденција на претседателот во раните утрински часови на средата. Сопругата на претседателот Мартен Мари Етјен Жозеф беше повредена во нападот и потоа пренесена на Флорида на лекување, каде што, наводно, се наоѓа во стабилна состојба.
Сè уште не е јасно кој го организирал нападот и кој е мотивот. Привремениот премиер на Хаити, Клод Жозеф, за BBC изјави дека 53-годишниот претседател можеби бил мета поради неговата борба против олигарсите во земјата.
Во четвртокот, полицијата претстави некои од осомничените пред медиумите, заедно со оружје, колумбиски пасоши и други докази.
„Странците дојдоа во нашата земја да го убијат претседателот. Ние ќе ги засилиме истрагите и претресите за пресретнување на другите осум платеници", рече Шарл.
