Со поздравни обраќања на премиерот на Северна Македонија Димитар Ковачевски, претседателот на Србија Александар Вучиќ и премиерот на Албанија Еди Рама во Белград започна лидерскиот Самит „Отворен Балкан“.
Официјални лица од земјите од регионот вчера се собраа во Белград на отворањето на самитот на иницијативата Отворен Балкан, каде во рамките на почетокот на самитот се одржа саем наречен „Винска визија на Отворениот Балкан“. Но, се чини дека некои функционери малку повеќе се опуштија на овој настан.
Во стилот на вистински домаќин, српскиот претседател Александар Вучиќ ги угости лидерите на Албанија, Северна Македонија и Црна Гора на овој саем, каде што можеа да уживаат во дегустација на локални вина.
Поминувајќи од штанд на штанд и дегустирајќи вина, Вучиќ во еден момент беше видно поднапиен, а во телевизискиот пренос се пофали дека може многу да испие.
„Ми броеја, испив повеќе од 100 чаши, тоа што не ми е ништо, тоа е друга работа, во сабота пак доаѓам“, се пофали претседателот на Србија во телевизиски пренос.
За време на турата „веселиот“ Вучиќ разговараше и со својата советничка за медиуми Сузана Васиљевиќ, која се обиде да му ја земе чашата со вино.
„Сака да го проба виното. Се грижи да не пијам многу. Во ред е“, им рече Вучиќ на насобраните.
Иако советничката ја врати чашата на штандот откако го проба виното, Вучиќ инсистираше да му ја вратат чашата.
Медиумите во Србија јавуваат дека Васиљевиќ во еден момент се обидела да ја зграби Вучиќ за рака, но тој се оттргнал и со еден поглед ѝ ставил до знаење да се оттргне од него, што на крајот и го направила.
„Виното ги зближува луѓето и овој саем е само конкретизирање на нашата поврзаност во рамките на иницијативата Отворен Балкан“, рече Вучиќ претходно истиот ден.
Иако не се знае какви конкретни резултати ќе даде новиот самит на земји, во едно не треба да се сомнева. На средбата веројатно сите, судејќи по воведот во самитот, ќе имаат проблем со главоболка.