Познати сите учесници на Голд Купот, Мексико главен фаворит

Ако Европското првенство и Копа Америка се во самиот финиш, допрва почнува првенството на Северна Америка каде фудбалската понуда е сепак далеку посиромашна.

Сабота вечер од 23 часот ќе почне и ова фудбалско натпреварување откако ќе го отворат репрезентациите на Ел Салвадор и Курасао, за потоа на сцена во 4 часот после полноќ да стапи фаворитот Мексико против тимот на Тринидад и Тобаго.

За разлика од ЕУРО и Копа Америка, Голд Купот не претрпе одложување бидејќи според календарот регуларно си беше закажан за оваа година. Домаќин е САД со 9 градови и 10 стадиони (Далас, Арлингтон, Хјустон, Фриско и Остин во Тексас, Глендеил во Аризона, Парадајз во Невада, Канзас Сити во Канзас и Орландо на Флорида).

Листата со 16 учесници со комплетира ноќеска откако се одиграа последните квалификациски натпревари. Хати со 4:1 ги елиминираше Бермудските Острови, а Гваделуп ја изненади Гвателама елиминирајќи ја со 10:9 на пенали откако натпреварот заврпи 1:1. Ден порано Тринидад и Тобаго исто така на пенали, со 8:7, ја победи Француска Гвајана откако и тој натпревар заврши 1:1.

Како гостин на првенството ќе учествува и репрезентацијата на Катар од Азија, која наредната година ќе биде домаќин на Мундијалот. Катар преклани беше дел и од Копа Америка каде требаше да учествува и годинава, но откажа поради промена на календарот во азиските квалификации.

Учество ќе земат и две репрезентации кои не се членки на ФИФА бидејќи не се независни држави, туку претставуваат француски прекуокеански територии. Тоа се островите Мартиник и Гваделуп.

Покрај Мексико, кој како 11-кратен освојувач е главен фаворит, во потесниот круг на кандидати за пехарот се и САД, Канада и Костарика иако на турнирот нема да настапат ѕвездите како Кристијан Пулишиќ (Челси), Џонатан Дејвид (Лил) и Кејлор Навас (ПСЖ).

Финалето ќе се игра на 1 август на „Алиџант“ стадионот во Парадајз, Невада, со почеток од 20:30 по локално време.