На синоќешниот натпревар помеѓу Тотенхем и Ливерпул (2:1) беше забележана најголемата судиска грешка во историјата на Премиер лигата откако е воведена ВАР технологијата.
Во тек беше во 34. минута, при резултат 0:0, кога Мохамед Салах фантастично го проигра Луис Диас, а тој излезе сам пред Гиљермо Викарио и постигна гол. Но, помошниот судија го крена знаменцето и сигнализираше офсајд.
Главниот судија на натпреварот, Сајмон Хупер, по само 40 секунди разговор со колегите во ВАР собата, свирна офсајд позиција на напаѓачот на Ливерпул и го поништи неговиот гол.
И покрај тоа што со „голо око“ беше очигледно дека не станува збор за офсајд, на Ливерпул му беше ускратен гол, што на крајот на сезоната може да значи неосвојување титула или неодење во Лигата на шампионите, со оглед на тоа што синоќа на крајот беа поразени со 2:1.
Недолго по натпреварот, Судиската организација на Премиер лигата (ПГМОЛ) излезе и призна дека на Ливерпул му бил поништен чист гол.
„Судиската организација е свесна за значајната човечка грешка што се случи на натпреварот помеѓу Тотенхем и Ливерпул. Голот на Луис Диас беше поништен со сигнализација за офсајд на судијата на натпреварот што беше чиста грешка и голот требаше да биде досуден. Сепак, ВАР не ја поправи оваа грешка. Ќе анализираме како настанала таква грешка и ќе контактираме со Ливерпул и ќе ја потврдиме грешката“, се вели во официјалното соопштение на ПГМОЛ.
А што всушност се случило го разјасни Sky Sports, а тоа само дополнително ќе ги налути сите во Ливерпул.
Откако Диас постигна гол, помошниот судија го крена знамето, а судијата го уважи тоа и свирна офсајд.
Тогаш се вклучија и судиите од ВАР собата кои исцртаа црти кои за жал гледачите на ТВ екраните не ги видоа.
Грешката настанала затоа што во ВАР собата мислеле дека голот е признат на теренот, а по проверката утврдиле дека нема офсајд и го известиле судијата дека ја донел вистинската одлука и тој автоматски останал на својата одлука што ја донел на терен.