Откако бројот на заболени почна да расте, во градот се воведе карантин, а забранети се сите собири вклучувајќи и спортски натпревари.
Покрај очајната форма во која се „Лисиците“, сега нов проблем им направи ситуацијата со коронавирусот во градот. Британската влада објави дека прв град на Островот кој целосно оди во карантин е Лестер откако дури 10% од заразените во Обединетото Кралство се токму од тој град.
„Им препорачуваме на жителите на Лестер да останат дома колку што е можно подолго, а советуваме да не се патува во и надвор од Лестер“, рече Мет Хенкок од Министерството за здравство.
Лестер утре гостува во Ливерпул кај Евертон, но потоа во сабота има домашен натпревар. Премиер лигата сериозно ја разгледува опцијата саботната пресметка со Кристал Палас да биде преместена на неутрален терен.
„Доколку тоа што се случува во Лестер влијае и врз можноста клубот да организира натпревари на домашен терен, дали само в сабота со Кристал Палас или и наредните натпревари, во тој случај ќе бидеме приморани тие натпревари да ги преместиме или одложиме до датум кога ќе биде безбедно да се игра“, вели Ричард Мастерс од Премиер лигата.
Лестер по принудната пауза бележи слаби резултати. Одигра нерешено со Вотфорд и Брајтон во лигата, а испадна од ФА Купот губејќи дома од Челси.
