Извозот на ЕУ во Русија е намален за две третини од почетокот на војната во Украина, но производите под санкции го пронаоѓаат патот до рускиот пазар преку други земји, според анализата на германскиот економски институт ifo.
Обемот на извозот на ЕУ во Русија е сè уште голем, меѓу другото, бидејќи само 32 отсто од производите се опфатени со санкции, објаснува Феодора Тети, заменик-директор на Центарот за меѓународна економија ifo.
„Кога станува збор за луксузни стоки, се санкционира извозот на шампањ во Русија, но не и на просеко“, вели Тети.
На тоа треба да се додаде и можноста за извоз преку трети земји, забележува Ifo, повикувајќи се на анализата на базата на податоци.
Кина се најде на прво место на листата на добавувачи на производи под санкции, со удел во увозот од 61 отсто. Во 2021 година, тоа беше само 35 проценти. Уделот на Турција се зголеми на 13 отсто, од само три отсто во 2021 година, откри германскиот институт.
Русија во моментов набавува санкционирани производи и од Ерменија, иако скромни еден процент. Во истиот период, извозот на ЕУ во Ерменија се удвои, забележува ifo.
„Порастот на кинескиот извоз во Русија може барем делумно да се објасни со поголемото домашно производство“, рече Тети, додека неочекуваниот и остар скок на турскиот и ерменскиот извоз во Русија води до заклучок дека санкциите се заобиколуваат, додава таа.