Кинески истражувачи открија фосил од череп којшто би можел да припаѓа на целосно нов вид луѓе, што потенцијално би можело да ги промени погледите на научниците за тоа како еволуирал нашиот вид.
Научници објавија дека череп, стар најмалку 146.000, години лежел сокриен во напуштен бунар во Кина цели 88 години, каде бил оставен од работник којшто го открил во 1933 година во текот на градежни работи.
Тој го сокрил черепот на дното на семеен бунар, а пред да почине тајната им ја открил на најблиските од семејството. Така на крајот черепот стигнал во рацете на научниците.
Истражувачите новиот вид го нарекоа Хомо лонги или „човек змеј“ по подрачјето околу реката Лонги (Змеј) на североистокот на Кина, каде е и откриен. Резултатите од истражувањето се објавени во списанието The Innovation.
Еден од главните британски експерти за човечката еволуција, професор Кристофер Стрингер од Природно-научниот музеј во Лондон и еден од авторите на два од три труда за Човекот змеј, беше дел од истражувачкиот тим и смета дека ова откритие е едно од најважните досега.
„Ја пронајдовме нашата изгубена сестринска лоза“, вели Сијун Ни, еден од авторите на студијата и палеоантрополог од Кинеската академија на науки.
Черепот му припаѓал на Хомо лонги, прилично висок возрасен човек. Научниците тврдат дека имал рамни образи и широка уста. Од черепот недостига долната вилица, а според горната вилица научниците сметаат дека немал изразена брада. Мозокот му бил околу 7% поголем од мозокот на денешните луѓе.
Научниците веруваат дека човекот Змеј имал силна физичка сима, но малку се знае за тоа како живеел бидејќи не се пронајдени други предмети кои му припаѓаат.
