Русија подготвува и вакви напади, кои всушност тешко се докажуваат.
Според извештаите, московската ИТ компанија NTC Vulkan развила алатки кои државните хакери би можеле да ги користат за планирање на сајбер напади, филтрирање на интернет сообраќајот и ширење масовна пропаганда и дезинформации. Ова го соопшти меѓународната истражувачка медиумска група во која спаѓаат германските весници Süddeutsche Zeitung и Der Spiegel, како и други канали на јавниот сервис ZDF. Во документите се иднетификувани и можни цели на нападите, меѓу кои и „оневозможување на контролните системи на железничкиот, воздушниот и поморскиот сообраќај“ или „нарушување на функциите на енергетските компании и критичната инфраструктура“.
Како што наведува Süddeutsche Zeitung, редакцијата, набрзо по почетокот на рускиот напоад на Украина, од анонимен извор добила интернет документ за периодот 2016-2021 година. Новинарите од овој весник правеле проценки заедно со меѓународни медиумски партнери. Како што се наведува во соопштението, експерти за сајбер безбедност и неколку западни разузнавачки служби оцениле дека документите се автентични, пишува Deutsche Welle.
Според информациите, станува збор за илјадници страници интерни документи на фирмата NTC Vulkan, како што се планови на проекти, описи на софтвер, инструкции, интерни мејлови и документи за банкарски трансфери на компанијата. Според извештајот, документите покажуваат како руските тајни служби со помош на приватни компании планираат и спроведуваат хакерски операции низ светот.
Овие документи анонимен извор најпрвин ги проследил до Süddeutsche Zeitung веднаш по почетокот на војната, а подоцна информацијата ја ставил на располагање на другите медиуми, пишува Der Spiegel. Изворот како мотив навел дека руската војна е војна со агресија и дека NTC Vulkan има блиски врски со тајните служби како ФСБ, ГРУ и СВР.
Ниту компанијата, ниту портпаролот на Кремљ не сакаа да ги коментираат извештаите во медиумите, но ZDF ја пренесува изјавата на поранешен вработен во NTC Vulkan: „Vulkan е столб на руската полициска држава. Компанијата развива софтвер кој може да се користи против сопствениот народ, но и против други земји“.
Не може да се следи дали и каде се користел овој софтвер и дали моментално се користи во Украина. Сепак, документите покажуваат дека програмите биле нарачани, тестирани и платени.
Сајбер нападите во име на државите се сметаат за модерно оружје за војување и пропаганда, и обично тешко се докажуваат. Обвиненијата против Русија за намерно користење на интернет за дезинформации постојат долго време, а тоа беше споменато и по кампањата за претседателските избори во САД во 2016 година.
