Во Албанија е регистриран прв случај на заразен со Делта сојот на коронавирусот. Се работи за иселеник кој допатувал од Обединетото Кралство, пренесува Top Channel.
Според истиот извор споменатото лице уште во земјата во која живеело имало благи симптоми, поради што направило тест пред да замине и еден ден по пристигнувањето во Тирана, англиската лабораторија му испратила одговор дека е позитивно на Делта сојот.
– Да, можно е да влегол веќе заразен. Овој период имаме многу лица за влез и излез. Исто така оваа мутација е веќе потврдена во соседните земји. Уште повеќе што се предвидува дека Делта ќе преовладува. Но, ова можеби не е единствениот случај. На крајот на краиштата, луѓето доаѓаат во нашата земја од места заразени со Делта, а за влез не бараме минимум ни негативен тест, изјави за телевизијата Скендер Братај, директор на Националниот ургентен центар.
Братај, кој е и член на Комитетот на експерти за справување со пандемијата додава дека сѐ уште се чека резултат за повеќе сомнителни случаи чии тестови се испратени во референетната лабораторија во Германија.
– Негативна страна е што бројот ќе се зголеми, што фаворизира понатамошен раст наесен и тоа е проблемот во цела Европа, затоа што веќе се зголемува бројот на оние кои се хоспитализирани. Најпогодени се млади под 30-годишна возраст и невакцинираните, посочува Братај.
Во меѓувреме во земјата продолжува вакцинацијата на населението а пристигна и нова пратка од 18.920 дози вакцини од Pfizer/BioNTech.
„Аеродром 'Мајка Тереза' - Пристигнаа 18.720 дози вакцина Pfizer, со што бројот на вакцини досега пристигнати во Албанија достигна 1.238.790. Албанија се насмевнува, напиша премиерот Еди Рама на Facebook.
