Пари Сен-Жермен би можел да се најде во голем проблем доколку се докаже „измама“ околу трансферот на играчи за да се исполнат правилата на финансискиот фер-плеј.
Спорни се три трансфери од ПСЖ, клуб во катарска сопственост, во катарските клубови Ал-Ахли и Ал-Араби.
Јулиан Дракслер беше продаден на Ал-Ахли за 9 милиони евра, додека Ал-Араби ги купи Абду Диало за 15 милиони, а Марко Верати за дури 45 милиони евра.
Овие трансфери го вклучија црвениот аларм во УЕФА, па беше отворена истрага за да се утврди дали богатиот шеик Насер Ал-Хелајфи, еден од најмоќните луѓе во земјата, суштински ги продал играчите на себеси, односно влијаел на сопствениците на Ал-Ахли и Ал-Араби да потрошат вкупно 69 милиони евра, што значително го подобри финансискиот фер-плеј статус на ПСЖ.
Доколку се докажат овие сомнежи, УЕФА ќе одбие да ги вклучи тие пари во пресметката на ФФП на ПСЖ, а на парискиот клуб најверојатно ќе му се заканува забрана за трансфери во еден иден преоден рок.