Пари Сен Жермен се подготвува за заминувањето на Килијан Мбапе следното лето.
Португалскиот спортски весник A Bola, повикувајќи се на шпански OkDiario, објави дека клубот ќе ги искористи сите пари што ќе ги заработи од неговата продажба за да го донесе Жоао Феликс.
Одамна е познато дека Мбапе сака да замине во Реал Мадрид, а и шпанскиот клуб не ја крие желбата да го добие младиот Французин.
Договорот на Мбапе со ПСЖ истекува летото 2022. За да не го загубат без обештетување, парижаните ќе мора да го продадат Мбапе, а се проценува дека Реал ќе плати помеѓу 150 и 200 милиони.
ПСЖ најголемиот дел од тие пари ќе ги потроши за да донесе замена за Мбапе, а изборот падна на 21-годишниот Португалец, кој пристигна во Атлетико од Бенфика летото 2019 година за 126 милиони евра.
Феликс има договор до летото 2026 година и клаузула за излез од дури 350 милиони евра, но парижаните сметаат дека поради финансиските последици од пандемијата, Атлетико нема да инсистира на такво обештетување, туку ќе го ослободи за сума идентична или слична на она што тие ќе го заработат од трансферот на Мбапе во Реал.
